10 траўня «Ворша» ў матчы першынства Беларусі сярод камандаў І лігі ў футболе адправілася ў Менск. Працілнікам была маладая каманда «Юні Ікс Лабс». У сустрэчы болей валодала мячом і прасторай каманда гаспадароў, але менавіта аршанцам удавалася зрэдчас стварыць вялікую небяспеку.
Напрыклад, на 45-й хвіліне матчу брамнік «Юні Ікс Лабс» у невераемным скачку адбіў удар Івана Ціханава.
У другой палове рысунак гульні застаўся ранейшым, больш атакавалі менчукі, але досыць надзейна дзейнічаў Макараў. На 75-й моцна побач з слупком прабіў Дзмітрый Тамэла. Варта адзначыць, што капітан зноў быў сама небяспечным у нашай камандзе для брамы спадужніка.
Урэшце, менавіта ён на 90-й хвіліне, ужо на заключных секундах асноўнага часу сустрэчы пасля перадачы Ягора Нікіпаронка трапна выцэліў у «дзявятку» брамы гаспадароў — 1:0!
«Ворша» здабывае тры важныя пункты і крыху далей адыходзіць ад зоны вылету з лігі.
