Былая беларуская лёгкаатлетка, а цяпер трэнерка Аліна Талай расказала пра тое, як пераадолела дэпрэсію. Яна напісала пра цяжкі перыяд жыцця пасля заканчэння спартовай кар’еры ў сваім інстаграме.
«Жыццё часам падкідвае нам нечаканыя выпрабаванні, і часам яны аказваюцца занадта цяжкімі для ўспрымання. Я хачу падзяліцца гісторыяй пра свой шлях.
Калі мне прыйшлося завяршыць сваю прафесійную кар’еру з-за траўмы — гэта стала сапраўдным шокам. Спорт быў не проста працай — гэта было маё жыццё, мой запал і мая ідэнтычнасць. Раптам я апынулася ў сітуацыі, калі тое, што вызначала мяне на працягу многіх гадоў было аднята. Пачуццё страты стала пераважнай.
Дэпрэсія прыйшла неўзаметку, але хутка ахутала мяне. Кожны дзень здаваўся барацьбой — з сабой, з эмоцыямі, з нявызначанасцю будучыні. Я задавала сабе пытанні: хто я без спорту? Што мне рабіць далей? Устаць з ложка было нерэальным намаганнем волі, а думкі пра тое, каб скончыць усё радыкальным чынам, сталі наведваць усё часцей.
Але з часам я зразумела, што важна не заставацца сам-насам з гэтым болем. Я пачала шукаць дапамогу і падтрымку. У маім жыцці з’явілася псіхатэрапія і антыдэпрэсанты, якія дапамаглі мне выбрацца з гэтай эмацыйнай ямы.
Сёння я разумею, што траўма і кардынальныя змены ў жыцці — гэта не канец, а магчымасць пераасэнсаваць яе і знайсці новыя мэты. Я вучуся прымаць змены і адаптавацца да новых рэалій. Кожны дзень — гэта новы крок на шляху да адчування паўнаты жыцця.
Калі вы таксама сутыкнуліся з такімі цяжкасцямі, ведайце: вы не адны. Не бойцеся звяртацца па дапамогу і дзяліцца сваімі перажываннямі. Памятайце, што нават у самыя цёмныя часы ёсць надзея на светлую будучыню».
Аліна Талай — выхаванка вядомага аршанскага трэнера Аляксандра Гуціна. Менавіта пры ім яна з звычайнай школьніцы вырасла ў спартоўку высокага класу і пачала ездзіць на міжнародныя спаборніцтвы.
Бягуха, якой 14 траўня споўніцца 36 гадоў, чэмпіёнка і прызёрка шэрагу чэмпіянатаў свету і Еўропы. Доўгі час была адной з галоўных алімпійскіх надзей Беларусі, але алімпійскі медаль у бар’ерным бегу ёй не скарыўся. У Беларусі ў яе дысцыпліне — 100 метраў з бар’ерамі — Аліне доўгія гады не было роўных. Кар’еру спартоўкі заўчасна абарвалі траўмы. Аднак затым Талай стала трэнеркай і працавала нават у футбольным клубе БАТЭ. Цяпер актыўна дзеліцца сваімі методыкамі і працуе з фізічнай падрыхтоўкай атлетаў.
