Футбалісты «Воршы» пасля паразы 2:7 у першым туры ад барысаўскага БАТЭ-ІІ перабывалі не ў найлепшым настроі. Аднак і супар па другім туры — «Мінск-ІІ» — у стартавым матчы без варыянтаў прагуляў «Астраўцу» 1:4. Таму сустрэча ў менскай Лошыцы была хутчэй «за 6 пунктаў», як гіпербалізавана гавораць футбольныя каментатары, падкрэсліваючы надзвычайную важнасць выніку ў паасобным паядынку.

У адрозненне ад вялікай колькасці гульняў у суботу, надвор’е не перашкодзіла правесці сустрэчу. А, напрыклад, паядынак менскага «Дынама» і гарадзенскага «Нёмана» ў той жа сталіцы праз неспрыяльныя ўмовы — снег — перанеслі.

Абедзве каманды мелі шанцы вызначыцца, але ў канцы, варта адзначыць, гол пачаў наспяваць у браму гаспадароў. Напрыклад, на 89-й хвіліне цудоўную магчымасць меў Дзмітрый Тамэла — удар аршанскага злучнага спараваў брамнік менчукоў. Пасля гэтага супраць Тамэлы парушылі правілы. Падача свабоднага з правага краю — брамнік «Мінска-ІІ» адбівае мяч за карную зону. Аршанцы падбіраюць яго і працягваюць атаку. Адна за адной следуюць некалькі спробаў ударыць, але ўрэшце мяч адкатваюць на Пунінскага, які пры падачы свабоднага стаяў побач з Тамэлам, але стандарт не выконваў. І Уладзіслаў ударам у далёкі кут брамы заганяе адзіны гол у матчы!

Перамога аршанцаў 1:0, цяпер наша каманда мае тры пункты ў турнірнай табліцы. Другі тур завершыцца пазней, і тады мы даведаемся, якое месца ў «Воршы» пасля яго.