На аўкцыён, які адбудзецца 20 траўня, выстаўлена некалькі аб’ектаў, якія належаць установе адукацыі. Гэта двухпавярховы цагляны будынак з пяццю тэрасамі 1963 года пабудовы агульнай плошчай 884,00 кв. м па адрасе вул. Паркавая, 3. І яшчэ 3 гаспадарчыя пабудовы і адно збудаванне «капітальнае неўстаноўленага прызначэння» — з бетоннымі дарожкамі, агароджай, варотамі, брамкай і фантанам.

Усё гэта можна купіць за 5 базавых велічынь (210 рублёў — пачатковы кошт). Зямельны ўчастак плошчай 0, 5879 га, на якім знаходзяцца аб’екты нерухомасці, прапануецца ўзяць у арэнду на 25 гадоў. Новы гаспадар можа выкарыстаць будынкі пад аб’екты гандлю, грамадскага харчавання, культурнага прызначэння, бытавога абслугоўвання.

Гісторыя «лішняй» школьнай маёмасці тыповая для нашага часу: калісьці тут быў дзіцячы садок, потым яго перадалі СШ № 15, там займаліся малодшыя школьнікі. А потым здарылася непрыемнасць: падчас навальніцы на дах аднаго з будынкаў звалілася сасна. Дзяцей перавялі ў іншыя карпусы, а пашкоджаны рамантаваць не сталі. А калі мясцовыя жыхары пачалі абурацца, то гарадскія ўлады абвясцілі, што ён " аварыйны. Не выключана, што цяпер так і ёсць: праз дзіркі ў даху ўнутр трапляюць ападкі, руйнуючы сцены...

У Барані ўсяго дзве школы, і маёмасць абедзвюх, якая стала непатрэбнай у першую чаргу праз безгаспадарчасць, цяпер спрабуюць прадаць. Мы ўжо пісалі аб спробах продажу корпуса СШ № 18.