Следства ўстанавіла, што жанчына, працуючы гандляркай, у перыяд з кастрычніка па снежань 2024 г.у некалькі прыёмаў выкрала чужую маёмасць - прысвоіла даручаныя ёй наймальнікам грашовыя сродкі і таварна-матэрыяльныя каштоўнасці на агульную суму не менш за 2 500 рублёў 77 капеек.
Нанесеную шкоду падсудная кампенсавала яшчэ да пачатку судовага працэсу, і суд вырашыў вызваліць яе ад крымінальнай адказнасці. Але было прыменена мера адміністрацыйнага спагнання ў выглядзе штрафу памерам 20 базавых велічынь ( 840 рублёў). Гэта значыць штраф ааказаўся ў тры разы меншы за агульную суму нанесенай шкоды.
Жанчына панесла і маральнае пакаранне: яе судзілі публічна, выязное пасяджэнне Дубровенскага райсуду адбылося 30 красавіка ў Якубаўскім сельскім Доме культуры (у аграгарадку Якубава Дубровенскага раёна). Судовае рашэнне ўжо ўступіла ў законную сілу.
Паказальныя суды ўсё часцей становяцца мерай не столькі выхавання, колькі застрашвання. Нядаўна мы пісалі пра выязны суд у Шклоўскім раёне: там гэтак жа ў Доме культуры мясцовую жыхарку судзілі за скажэнне інфармацыі аб склоне жывёлы.
