Віцебская епархія анансавала збор для расейскіх акупацыйных войскаў ва Украіне.
Грошы будуць збірацца прадстаўнікамі РПЦ для так званых «ваенных падраздзелаў ДНР і ЛНР».
З 18 па 28 траўня ў Віцебску адбудзецца Велікодны міжнародны праваслаўны фестываль «Радасць», арганізаваны Свята-Елісавецінскім манастыром пры падтрымцы Віцебскага гарвыканкама. У рамках фестывалю аб’яўлена (https://vitprav.by/58749.html) дабрачынная акцыя «Дапамога жыхарам Данбасу», падчас якой будуць збірацца сродкі не толькі для бальніц і мірных жыхароў, але і для ваенных падраздзелаў самаабвешчаных ДНР і ЛНР.
Фестываль праходзіць пад патранатам арцыбіскупа Віцебскага і Аршанскага Дзімітрыя.
Гэты фестываль праходзіць у розных гарадах Беларусі і Расеі рэгулярна з падобнымі зборамі, але, зазвычай, прызначэнне ў выглядзе баявых патрэбаў у афішах раней імкнуліся схаваць, зазначае «Хрысціянская візія».
Свята-Елісавецінскі манастыр даўно займаецца прапагандай вайны і не першы год збірае сродкі для расейскіх войскаў, якія акупавалі частку тэрыторыі суседняй Украіны.
