Суд Шклоўскага раёна разглядаў крымінальную справу паводле абвінавачвання супрацоўніцы ЗАТ " Ніва". Жанчына працавала начальнікам участка. У віну ёй было пастаўлена ўтойванне падзяжу жывёлы: па матэрыялах следства, з 2018 па 2024 год працаўніца рэгулярна ўносіла ў справаздачы звесткі аб забоі буйной рагатай жывёлы, фактычна хаваючы падзяжы кароў. Усяго абвінавачаная ўнесла ў справаздачнасць недакладную інфармацыю аб забоі 74 галоў жывёлы.

Суд вырашыў, што яе дзеянні былі прадыктаваныя асабістай зацікаўленасцю — імкненнем схаваць недахопы ў працы.

Жанчына цалкам прызнала сваю віну, у зробленым раскаялася, суд прызнаў гэта акалічнасцю, якая змякчае адказнасць. На падставе ч. 1 арт. 427 КК РБ работніцы прызначана пакаранне ў выглядзе папраўчых работ тэрмінам на 1 год з утрыманнем у даход дзяржавы 10% яе заробку, але не менш за адну базавую велічыню штомесяц.

Публічны судовы працэс быў арганізаваны" для прафілактыкі«: ён праходзіў у прысутнасці калег па працы і аднавяскоўцаў. Утойванне падзяжу жывёлы застаецца адной з самых распаўсюджаных праблем у аграрнай сферы, і з дапамогай падобных «паказальных працэсаў» у Шклоўскім раёне хочуць выкараніць гэтую з’яву. Хоць яна, у прынцыпе, часцей за ўсё абумоўлена не асабістымі фактарамі, а адсутнасцю адпаведных умоў утрымання жывёл на фермах раёна. У той час, як ад кіраўнікоў патрабуюць справаздач выключна аб поспехах галіны.