Для пачатку акрэслім, што такое “дзелавы турызм”. Гэта галіна турыстычнай індустрыі, закліканая забяспечыць арганізацыю дзелавых сустрэчаў, перамоў і гд.

Сенненскія ўлады прапануюць арэндаваць з гэтай мэтай дзве канферэнцзалы ў самім будынку райвыканкама ( на 130 месцаў з відэапраектарам і мікрафонамі і на 40 месцаў з вялікім тэлевізарам). Яшчэ ахвотным прапанавана выкарыстаць залу Сенненскай школы мастацтваў (120 месцаў плюс раяль) і залу Сенненскага раённага дома культуры (246 месцаў, у наяўнасці відэапраектар і мікрафоны).

У параўнанні з вялікай умяшчальнасцю залаў уражваюць вельмі сціплыя магчымасці мясцовага гатэля: усяго 27 ложкаў (18 нумароў), дзе прапанавана размясціцца заезджым бізнесменам.

З арганізацыяй дзелавых абедаў таксама варыянтаў усяго 2: рэстарацыя “Акропаль” і кавярня -пельменная “Лепім самі”.

Уявіць сабе турыстаў, якія хочуць правесці дзелавыя перамовы менавіта ў Сянно, дастаткова складана: у раёне няма буйных прамысловых прадпрыемстваў, а 8 сельскагаспадарчых ААТ цяжка назваць паспяховымі. Інвестыцый замежнага капіталу ў 2024-м годзе не было зусім, у 2023-м іх было ўсяго каля 6 тысяч долараў. У 2023 годзе чысты прыбытак у эканоміцы раёна склаў больш за 5 мільёнаў рублёў, а ў 2024 -м - зафіксаваны "мінус" на суму больш за 1 мільён рублёў.