Некалькі месяцаў спатрэбілася работнікам Лёзненскага райаддзела Следчага камітэта, каб знайсці злодзея, які ўзімку скраў ровар у жыхара вёскі Зуі. Пошукі былі абцяжараныя тым, што злодзей быў не мясцовы: 36-гадовы мужчына, які паквапіўся на чужую маёмасць, ужо некалькі год жыў у Расіі, а ў Беларусь прыязжаў толькі час ад часу. У адзін з такіх прыездаў ён і скраў ровар.
Адказваць за крадзеж замежнаму “госцю” давядзецца па беларускім заканадаўстве: яму прад’яўлена абвінавачанне паводле ч.2 арт.205 Крымінальнага Кодэкса (крадзеж з пранікненнем у жытло). Цяпер злодзей знаходзіцца пад вартай у чаканні суду, а скрадзеную маёмасць давялося вярнуць законнаму ўладальніку.
Рознага кшталту злачынствы, а таксама адміністрацыйныя правапарушэнні з удзелам жыхароў Расіі - далёка не рэдкасць у памежным Лёзненскім раёне. Так, сёлета ў лютым у Лёзне быў затрыманы жыхар Смаленска: ён знаходзіўся ў грамадскім месцы ў нецвярозым стане і адмаўляўся падпарадкоўвацца супрацоўнікам міліцыі. На яго склалі два адміністрацыйныя пратаколы і пакаралі арыштам на 6 сутак.
