Памятны камень Тадэвушу Касцюшку ля вёскі Касцюшкава ў Горацкім раёне Магілёўскай вобласці застаўся без інфармацыйнай шыльды. Яе адсутнасць заўважылі мясцовыя жыхары.
Памятны камень кіраўніку паўстання 1794 года Тадэвушу Касцюшку цяпер ляжыць без шыльды.
«Ці прыбралі, ці не ўзнавілі, хаця бачна, што помнікі побач прыводзілі ў парадак», — канстатавалі чытачы, якія падзяліліся сваімі ўражаннямі з журналістамі.
Да другой паловы ХХ стагоддзя вёска Касцюшкава называлася Трыгубава. У XVII стагоддзі ўваходзіла ў склад маёнтка Раманава Аршанскага павета Віцебскага ваяводства ВКЛ. У 1943 годзе была спалена нацыстамі, пасля вайны адбудавана. Цікава, што Трыгубава вызвалілі ў кастрычніку 1943 году ў выніку наступу 1-й польскай пяхотнай дывізіі імя Тадэвуша Касцюшкі, сфармаванай савецкімі ўладамі з польскіх грамадзян і этнічных палякаў.
У 1969 годзе Трыгубава пераназвалі ў гонар слыннага нацыянальнага героя Беларусі, Польшчы і ЗША, генералісімуса арміі Рэчы Паспалітай Тадэвуша Касцюшкі. А раней у суседнім Леніне ў 1968 годзе стварылі вялікі Музей савецка-польскай баявой садружнасці.
