Рэгіён, Здарэнні

Асцярожна, мядзведзі!

12.05.2025 14:36

139 праглядаў, 0 каментароў

У Сенненскім раёне лясныя жыхары падыходзяць блізка да вёсак

11 траўня на тэрыторыі паляўнічай гаспадаркі Багушэўскага лясгаса камера фоталавушкі засняла мядзведзя, які ішоў па лясной дарозе каля вёскі Масейкі Машканскага сельсавета.

Прыстасаванне, якое выкарыстоўваецца для перадухілення супрацьпраўных дзеянняў, засведчыла наяўнасць мядзведзяў у лясах на Сенненшчыне. Звяры актыўныя, і вясковым жыхарам варта быць асабліва ўважлівымі і памятаць: мядзведзь - гэта не добры персанаж з народных казак, а дзікая жывёла, здольная на хуткую і непрадказальную рэакцыю.

Каб не прыважваць мядзведзяў да чалавечага жытла, адмыслоўцы раяць не пакідаць на ўзлесках харчовыя адкіды, якія могуць прыцягнуць увагу звера.

У лесе таксама варта быць асцярожнымі. І калі сустрэчы з мядзведзем пазбегнуць не ўдалося, трэба паціху адыходзіць ад яго, не паварочваючыся спіной, і не рабіць рэзкіх рухаў, якія могуць справакаваць напад.