Раніца 19-га красавіка аказалася трагічнай для двух чалавек, на 600-м кіламетры магістралі М1 (Берасце-Менск-мяжа РФ) у Дубровенскім раёне сутыкнуліся Mazda 626 и Infiniti. Машыны былі жахліва дэфармаваныя, а два чалавекі загінулі. Да канца магістралі, якая сканчаецца колішнім прапускным пунктам “Рэдзькі”, заставалася ўжо 11 кіламетраў. На 599-м кіламетры быў арганізаваны рух толькі па адной паласе, бо вядуцца рамонтныя работы. Кіроўца “Мазды” на дарожныя знакі ўвагі не звярнуў і не вярнуўся на сваю паласу. На сустрэчнай ён і сутыкнуўся з “Інфініці”. 67-гадовы кіроўца “Мазды” і яго 59-гадовая пасажырка загінулі на месцы ад моцнага лабавога сутыкнення. Кіроўца “Інфініці”, грамадзянін Беларусі, які пастаянна пражывае ў Маскве, шпіталізаваны. Пра характар і сур’ёзнасць яго траўмаў пакуль няма дакладных звестак, як і пра тое, ці пагражае нешта ягонаму жыццю.
Пачата крымінальная справа па частцы 3 артыкулу 317 Крымінальнага кодэксу РБ (“Парушэнне ПДР або эксплуатацыі транспартных сродкаў асобай, якая кіруе транспартным сродкам, і якое пацягнула па неасцярожнасці смерць дзвюх і болей асоб”).
Фота ДАІ Віцебска, Следчага камітэту і МНС.
