Супрацоўнікі 7-га Упраўлення ГУБАЗіК пракуратуры Віцебскага раёну ўсталявалі, што экс-кіраўнік Сенненскага райвыканкама Віктар Цапота схаваў факт прычынення тэхнічных пашкоджанняў службоваму аўтамабілю. Гэта мела месца з сакавіка па красавік 2012 года. Пасля таго, як машына была пашкоджана, тагачасны мэр горада не паведаміў пра гэта здарэнне, што мусіў зрабіць паводле закону. Замест гэтага ён аддаў незаконнае распараджэнне падначаленым набыць запчасткі. А тыя, хоць мелі права адмовіцца, пагадзіліся, каб захаваць свае пасады. У выніку службовы аўтамабіль быў адрамантаваны цалкам за кошт бюджэтных сродкаў. На гэтым мэр не спыніўся. З 13 па 18 жніўня 2013 года ён адправіўся ў службовую камандыроўку ў Ізраіль, пры гэтым за пералёт плаціў ізраільскі бок. Аднак экс-мэр пазначыў у дакументах, быццам ён аплаціў пералёты за ўласны кошт.
Увесну 2017 года чыноўнікам зацікавілася пракуратура. Калі высвятляюцца крымінальныя падрабязнасці мінулага, нярэдка выплываюць і дэталі іншых спраў, да якіх аказаўся датычным чалавек. Абедзьве справы былі заведзеныя амаль адначасова. Першая - па частцы 3 артыкулу 426 (перавышэнне ўлады ці службовых паўнамоцтваў). Другая - па частцы 1 артыкулу 210 (крадзеж шляхам злоўжывання службовымі паўнамоцтвамі).
Суд разгледзеў усе матэрыялы справы, заслухаў паказанні сведак і вынес рашэнне - 4 гады пазбаўлення волі з канфіскацыяй маёмасці. Адбываць пакаранне экс-мэр горада Сянно Віктар Цапота будзе ў калоніі ўзмоцненага рэжыму. Акрамя таго, ён пазбаўлены права на 5 гадоў займаць пасады ў кіроўчых органах улады і пасады, звязаныя з выкананнем арганізацыйна-распарадчых і адміністратыўна-гаспадарчых функцый.
