Зводкі МНС на гэтым тыдні вельмі мала паведамлялі пра пажары ў Аршанскім і суседніх раёнах, але гэта кампенсавалася іншымі здарэннямі ў якіх спатрэбілася дапамога службы 101, асабліва дарожна-транспартнымі здарэннямі. Пажары на гэтым тыдні адбываліся ў Талачынскім і Круглянскім раёнах. У Талачынскім загарэўся гараж у вёсцы Багданаўка (не далёка ад Коханава). Акрамя самога гаража пацярпеў і аўтамабіль Аўдзі-80, які ў ім знаходзіўся. Другі пажар адбыўся ў горадзе Круглае на завулку Школьным - тут загарэўся прыватны дом. У доме ў момант пажару нікога не было, а гаспадар знаходзіўся на вуліцы. Найбольш у будынку пацярпеў дах.
У тым жа Круглым дапамога ратавальнікаў спатрэбілася і раніцай 4 лістапада. Разам з камунальнікамі супрацоўнікі МНС удзельнічалі ў ліквідацыі аварыі трубаправода халоднага водазабеспячэння. З-за прарыву трубы без вады засталіся 3 дзіцячых садка, 2 школы, бальніца, 17 шматкватэрных дамоў і 300 дамоў прыватных. Ужо ў абед водазабеспячэнне было адноўлена.
Кепскае надвор'е на прайшоўшым тыдні прывяло да цэлага шэрагу аварыяў на дарогах краіны. Аршанскім ратавальнікам двойчы давялося выязжаць на месцы здарэнняў для дэблакіроўкі заціснутых у машынах кіроўцаў. Адна аварыя ў якой сутыкнуліся мікрааўтобус і грузавік адбылося 31 кастрычніка каля вёскі Каробішча на трасе М1. Кіроўца мікрааўтобуса быў вызвалены з аўтамабіля ў непрытомным стане і так дастаўлены ў бальніцу. Другая аварыя здарылася на трасе Е95. Тут сутыкнуліся легкавы аўтамабіль, грузавік і мікрааўтобус. Зноў жа найбольш пацярпеў кіроўца мікрааўтобуса, якому спатрэбілася дапамога ратавальнікаў.
Але і гэта не адзіная аварыя на трасе Е95. Яшчэ адна адбылася на ўчастку Орша-Магілёў у Магілёўскім раёне вечарам 2 лістапада. Тут сутыкнуліся легкавы аўтамабіль і яшчэ адзін мікрааўтобус. У дадзеным выпадку заблакаваны аказаўся кіроўца легкавіка жыхар Горацкага раёна. Ён таксама шпіталізаваны. Вашай увазе фотаздымкі з месца гэтай аварыі.
