Амаль усе здарэнні пра якія на мінулым тыдні паведамлялі сайты міліцыі (МУС і УУС) у нашым рэгіёне тычыліся транспарту. Толькі адзін крадзёж не меў дачынення да транспартных сродкаў. Малады мужчына звярнуўся ў міліцыю з заявай, што пасля сыхода знаёмага, які быў у яго кватэры з вечара 31 кастрычніка па раніцу 1 лістапада, ён заўважыў знікненне грошай у памеры 111 рублёў. Міліцыя выявіла таго самага знаёмага, якому на сёняшні дзень усяго 18 гадоў.
Як гаварылася вышэй, усе астатнія здарэнні ў рэгіёне так ці іначай звязаныя з транспартнымі сродкамі. Акрамя аварыяў, пра якія мы паведамлялі на працягу тыдня, у адным з пад'ездаў гораду быў скрадзены ровар прыблізным коштам у сто рублёў. Крадзёж быў здзейснены ў перыяд з 31 кастрычніка на 2 лістапада. Заведзена крымінальная справа, але злачынца пакуль што не знойдзены.
Кралі на тыдні не толькі двухколавы транспарт, але і чатырохколавы. Ноччу 1 лістапада ў нашым горадзе быў скрадзены аўтамабіль Хундай-Салярыс 2016 года выпуска з расейскімі нумарамі . Машына і падазраваны былі хутка знойдзены.
А ў суседніх раёнах за тыдзень двойчы лавілі кантрабанду металу. У Талачынскім раёне каля вёскі Мураўнічы на трасе М1 быў спынены "МАН" пад кіраваннем жыхара Барысава, які вёз у Расею больш за 7 тонаў лома каляровых металаў на прыблізную суму ў 7.540 рублёў.
У Лёзненскім раёне міліцыянты знайшлі больш сціплы груз металалому: раніцай 28 кастрычніка (паведамленне пра затрыманне з'явілася ў зводках на апісваемым тыдні) быў спынены мікрааўтобус з 2 тонамі лома каляровых металаў. Перавозіў яго ў Расею жыхар вёскі Янавічы Віцебскага раёну.
