Для многіх аршанцаў лета - сезон сельскагаспадарчых работаў. Вырашыла папрацаваць над вырошчваннем раслін і жыхарка Барані 1987 года нараджэння. Жанчына ўжо мела праблемы з законам і таму вырошчваць памідоры ці бульбу для яе было занадта сумна. У доме сваёй маці яна абсталявала памяшканне для вырошчвання наркатычнай канаплі.
Знайшлі аматарку агародніцтва дзякуючы адмысловай міліцэйскай праграме "Мак", якая актыўна запускаецца ў летні перыяд. Пад час затрымання ў жанчыны было выяўлена 3,4 грамы ўжо высушанай марыхуаны, а ў доме маці выяўленыя ёмістасці з грунтам і прарошчаныя кусты канаплі. Цяпер супраць жанчыны заведзена крымінальная справа.
