У Віцебскі аблвыканкам, не дабіўшыся станоўчага для сябе адказу ад Аршанскага райвыканкама, звярнуўся жыхар Оршы Арцём Сізінцаў, занепакоены пабудовай чарговай праваслаўнай царквы ў горадзе, пагатоў у раёне, дзе ўжо ёсць некалькі праваслаўных цэркваў. Грамадскага дзеяча абурае факт падобных планаў праваслаўнай царквы, паколькі існуючы гістарычны будынак Базылянскага манастыра ніяк гэтай царквой не аднаўляецца і працягвае развальвацца. Віцебскі аблвыканкам, як і Аршанскі, не знайшоў ніякіх парушэнняў з боку царквы.

Арцём Сізінцаў пракаментаваў адказ такім чынам:

Віцебскі аблвыканкам таксама ня бачыць у пабудове чарговай царквы на аршанскім Задняпроўі парушэньняў. Цалкам верагодна, што я проста не туды зьвяртаюся. Прашу парады, што рабіць у гэтым выпадку. Нагадваю, што ацалелы будынак Базыльянскага манастыра застаецца ў занядбаным стане, у той час калі РПЦ працягвае будаваць царкву за царквой у горадзе, захопліваючы больш зямлі. Лісты ў епархію раней ужо неаднаразова пісалі, аднак ніякага плёну, акрамя новага даху на занядбаным будынку гэта не прынесла. Працягваюць будавацца новыя цэрквы пры зьмяншэньні колькасьці вернікаў, а на гістарычны будынак, важны як для хрысьціян, так і для ўсёй Воршы, наплявалі. Увесь гэты час розныя ячэйкі РПЦ робяць выгляд, што ня маюць сувязяў паміж сабой, няма грошай, няма часу і яшчэ чаго-небудзь. Што рабіць, да каго зьвяртацца?