Ставіць указальнікі турыстычных маршрутаў — слушная і своечасовая сусветная практыка. Балазе, у Оршы сапраўды ёсць што паглядзець. Аднак прызначаныя ў Оршу чыноўнікі цалкам у духу сваёй русіфікатарскай палітыкі ўсталявалі ўказальнікі без беларускай мовы. На знаках толькі расейская і ангельская мовы. Беларускай мовы ў беларускім горадзе няма, і турыстычныя ўказальнікі — не адзінае, што зрусіфікавана. Ужо шмат гадоў прыпынкі ў грамадскім транспарце агучваюцца на расейскай мове, хаця нядаўна ўлады пад ціскам грамадскасці паабяцалі вярнуць беларускую мову ў агучванне прыпынкаў. У Оршы ўжо амаль не засталося беларускай мовы на вулічных шыльдах, афіцыйныя асобы нават на дні незалежнасці Беларусі ігнаруюць беларускую мову. Орша нават на фоне агульнага фону русіфікацыі займае асаблівае месца, родная мова выкінута з усіх сфераў. У сваіх адказах чыноўнікі прыкрываюцца расейскімі турыстамі і дзвюма дзяржаўнымі мовамі, пры гэтым самі рэгулярна парушаюць прынцып "роўнасці моваў", паколькі беларускай няма амаль нідзе.
