Варта нагадаць, што ў Мікалая Куляшова пасля выбараў ужо праходзіла два "агляды памяшкання", а цяпер на трэці раз правялі вобшук. Розніца не толькі ў назвах, але і ў тым, што для "аглядаў памяшкання" не патрабуецца дазвол пракурора, а для вобшуку мусіць быць распачатая крымінальная справа.

Што ж за крымінальная справа. Аказваецца яшчэ ў ліпені ў Дуброўна пачалі з'яўляцца надпісы на асфальце, платах, а 16 ліпеня нехта нават размаляваў шапік "Табакерка", якія ў выбарчую кампанію сталі ледзь не сімвалам бізнэсу ўладаў і рэгулярна падвяргаліся нападкам.

Вінаватыя ў распісванні так і не былі знойдзеныя, а 30 снежня - у перадапошні дзень года - была заведзеная крымінальная справа.

А пры чым жа тут Куляшоў? Толькі пры тым, што па меркаванні маёра крымінальнага вышуку Дубровенскага РАУС Стаброніка М.А. да роспісаў можа мець дачыненне Мікалай Куляшоў. Менавіта грунтуючыся на рапарце Стаброніка і адбыўся ператрус у Куляшова. Па меркаванні самога Куляшова, такім чынам безпадстаўна з ім зводзяць рахункі за актыўную грумадскую пазіцыю. А безпадстаўна, таму што як і чакалася - нічога дома ў Мікалая не знайшлі.

Але Дубровенская міліцыя не была б сабой, калі б правяла толькі адзін вобшук за дзень. Звычайна калі ў гэтым райцэнтры нешта пачынаецца, то выглядае на поўную абламу. Так і ў гэты раз. Наколькі нам вядома, учора ж вобшук адбыўся і Наталлі Стрэльчанка.