Былы дырэктар аршанскага «Лакаматыву» Яўген Мазура паведаміў, што ў яго дома адбыўся ператрус у рамках крымінальнай справы. Сілавікі нічога не знайшлі, бо «фігурант» з’ехаў за мяжу і не пакінуў ніякай маёмасці, піша Радыё Свабода са спасылкай на спартовы сайт «Трыбуна».
«Са мной ніхто з сілавых структур не звязваўся, ніякіх дакументаў не дасылалі. Аднак, паводле маёй інфармацыі, Следчы камітэт усё ж завёў на мяне справу, інкрымінуючы перавышэнне ўлады або службовых паўнамоцтваў, прычыненне шкоды ў асабліва буйным памеры — ад 120 да 160 тысяч рублёў. Прычым інкрымінуюць парушэнне на пачатковым этапе, гэта значыць, у 2018 годзе», — патлумачыў Яўген Мазура.
У канцы чэрвеня 2018 году ў Воршы ствараўся хакейны клуб «Лакаматыў»: пачалася перадсезонная падрыхтоўка, фармаванне складу. Калі ў горад збіраўся Аляксандар Лукашэнка, мясцовым чыноўнікам карцела паказаць, што і ў іх зьявілася прафесійная хакейная каманда, расказвае перадгісторыю Яўген Мазура. У выніку загадалі, каб выглядалі не горш, чым усе астатнія.
«Для гэтага трэба было закупіць якасную экіпіроўку. Часу на тэндэр не было, мы склалі пералік, што трэба ў першую чаргу. Знайшлі пастаўшчыкоў, з якімі працавалі астатнія беларускія клюбы. Я вывучаў умовы кожнай фірмы, атрымаў камерцыйныя прапановы. Выбралі самы танны варыянт і ажыццявілі закупку. Прыйшла замова, мы паўдзельнічалі ў Кубку Салея. А нядаўна я даведаўся, што аб’явілася нейкая кантора, якая заявіла ў ДФР, што нібыта магла рэалізаваць прадукцыю па больш нізкіх коштах, каб іх дапусцілі да таргоў. І гэтыя 120-160 тысяч рублёў — якраз розніца паміж сумай, якую мы аддалі, і той, што прапанавала б фірма. Мне закідаюць растрату грошай».
Яўгену Мазуру пагражае пазбаўленне волі ад 3 да 10 гадоў. Ён кажа, што адмыслова чацвёрты месяц трымае беларускі нумар у роўмінгу, каб была магчымасць з ім зьвязацца. Але ні званкоў, ні лістоў — ніякіх спробаў сувязі з боку сілавікоў.
У Следчым камітэце на запыт журналістаў адказалі, што «інфармацыя патрабуе ўдакладнення». Калі ў ведамстве «палічаць патрэбным штосьці сказаць», то апублікуюць на афіцыйных рэсурсах.
У канцы жніўня 2020 году Яўген падпісаў «Адкрыты ліст з патрабаваньнем да ўлады», бо палічыў сваім абавязкам «зрабіць гэты невялікі крок» да спыненьня неапраўданай жорсткасці і гвалту.
Падпісанне адкрытага ліста абурыла федэрацыю хакею і ейнага старшыню Дзмітрыя Баскава, з якім у Яўгена Мазуры адбылася гутарка. Калі ў верасьні «Лакаматыў» пайшоў на месячны каранцін праз каранавірус, Баскаў звязаўся з кіраўніцтвам Воршы. Адразу пасля гэтага мясцовыя чыноўнікі запатрабавалі ў клуба кантракт і графік працы дырэктара.
15 кастрычніка быў апошнім ягоным працоўным днём. Фармальна Мазуру звольнілі пры згодзе бакоў. Паводле ягоных звестак, неўзабаве пасля гэтага ў каманду наведаўся Дзяржкантроль. У канцы снежня праверка скончылася — і цяпер на яго нібыта хочуць ускласці «нейкія страты».
Па звальненні Яўгену Мазуру знайсці занятак у беларускай спартовай індустрыі не ўдалося, і ён вырашыў з’ехаць за мяжу.
