Ужо на гэтым тыдні стане вядомым канчатковы склад футбольнага клуба «Ворша» на сезон-2022. На гэтым жа тыдні аршанцы стартуюць у чэмпіянаце Першай лігі. На клуб былі накладзеныя санкцыі, а менавіта — забарона падпісваць у каманду новых футбалістаў за нявыплачаныя даўгі перад былым трэнерам Канаплёвым і гульцамі Жданком і Хадневічам. Цяпер Беларуская федэрацыя футболу зняла забарону пасьля таго, як Аршанскі райвыканкам абяцаў у два заходы, у траўні і ў чэрвені выплаціць усе даўгі.
Калі гэтага не здарыцца — сіня-белых чакае новая забарона. У цэлым спартовыя журналісты разглядаюць нашу каманду ў якасці адной з найслабейшых у сёлетняй Першай лізе. За зіму аршанцы рассталіся з большасцю лідэраў, у тым ліку карэннымі аршанцамі Зянько і Жалезнікавым, якія вызначалі гульню «швейнікаў» у атацы. У выпадку аднаўлення забароны шанцы аршанцаў будуць расцэньвацца яшчэ ніжэй. А як атрымаецца — пабачым на полі.
