«Высокадакладныя ракеты знішчылі цэхі заводу „Мотор Січ“ у Запарожжы. Завод вырабляў рухавікі для баявой авіяцыі», — паведаміла Міністэрства абароны Расеі. Таксама некалькі ракет прыляцелі ў іншыя раёны Запарожжа, у тым ліку жылыя кварталы. Ёсць загінулыя і параненыя.

Расея працягвае казаць аб тым, што бамбуе толькі вайсковую інфраструктуру, аднак існуюць сотні фота- і відэадоказаў, калі расейскія войскі абстрэльваюць школы, дзіцячыя садкі, лякарні і жылыя дамы. Усюды гінуць людзі, звыш 6 мільёнаў жыхароў Украіны, у тым ліку і расейцаў, сталі ўцекачамі.

Завод «Мотор Січ» некалькі гадоў працаваў над праектам інвестыцый у Аршанскі авіярамонтны завод. Аднак у красавіку 2018 году Генеральная пракуратура Беларусі распачала праверку прадпрыемства праз нібыта невыкананне інвестыцыйнай дамовы, а таксама завяла крымінальную справу на былога гендырэктара ААТ «Аршанскі авіярамонтны завод» і службовых асобаў «Мотор Січ». Інвестары меліся ўкласці ў мадэрнізацыю заводу 12 млн даляраў, але не рэалізавалі гэтыя планы з прычыны расейска-ўкраінскага канфлікту: расейцы адмовіліся пастаўляць на завод патрэбныя запчасткі, а колькасць замоваў знізілася.

Кіраўніцтва групы «Мотор Січ» тады пераконвала, што ўклала ў завод 20 мільёнаў даляраў і «падняла кампанію з руінаў».

Аднак ужо ў ліпені 2018 году на завод прыехаў Лукашэнка і загадаў нацыяналізаваць прадпрыемства. Так скончылася гісторыя «Мотор Січ» на Аршаншчыне.