Першым супернікам, з якім сустрэлася наша каманда на стартавым этапе, была мазырская каманда Нафтаперапрацоўчага заводу. Сіня-белыя мелі праблемы з узломам абароны супернікаў, але на 82-й хвіліне ўсё ж забілі. Прычым зрабіў гэта паўабаронца з расейскім пашпартам Міхаіл Захараў, які толькі перад матчам падпісаў кантракт з камандай.
Захараў ужо выступаў за «Воршу» ў мінулым годзе, але ў другім коле адправіўся ў Бабруйск, бо тады належаў «Белшыне».
У сустрэчы адбылася знакавая падзея — нападнік аршанцаў, гуляючы трэнер Мікалай Кітаёў выйшаў на замену на 88-й хвіліне, згуляўшы свой 350-ы матч за «Воршу». Гэта рэкорд усіх часоў.
У наступным раўндзе, у 1/16 фіналу супернікамі «Воршы» будуць футбалісты «Гомеля», дзейнага ўладальніка Кубку Беларусі, з якімі аршанцы сустракаліся на гэтай стадыі і ў мінулым годзе. Матч адбудзецца 22 або 23 чэрвеня.
