15 ліпеня пенсіянеру з Воршы паступіў «традыцыйны» званок ад махляроў, паведамляе УСК па Віцебскай вобласці. Суразмоўніца назвалася нявесткай і слёзна прасіла дапамагчы, бо яна стала вінаватай у ДТЗ.
Каб пазбегнуць пакарання, трэба было заплаціць пэўную суму, паведаміла псеўдасваячка. Падчас тэлефоннай размовы ў пакой увайшла жонка мужчыны, яна ўсумнілася ў праўдзівасці званка. Пасля чаго ашуканцы звязаліся з ёй па нумары тэлефона і працягнулі зносіны.
Праз некалькі гадзін «апрацоўкі» пенсіянераў, тыя перадалі ашуканцам праз кур’ера ўсе свае зберажэнні — 25 тысяч даляраў.
Толькі праз нейкі час мужчына вырашыў патэлефанаваць свайму сыну і даведацца ў яго ўсю інфармацыю, а стэлефанаваўшыся з ім, зразумеў, што стаў ахвярай тэлефонных ашуканцаў.
Распачата крымінальная справа па артыкуле 209 ч.4.
Нягледзячы на неаднаразовыя папярэджанні, людзі ўсё адно ахвотна давяраюць махлярам, якіх потым даволі цяжка знайсці, паколькі тыя выкарыстоўваюць падстаўныя сім-карткі, чужыя тэлефоны і змяняюць месца дыслакацыі.
