Служба бяспекі Украіны апублікавала аўдыёзапісы перамоў, якія, на думку спецслужбаў, сведчаць віну Багуслаева і яго зраду Украіне. У СБУ кажуць, што нават пасля паўнамаштабнага ўварвання расейскіх войскаў на ўкраінскую тэрыторыю Багуслаеў са сваім прадпрыемствам не перасталі супрацоўнічаць з расейцамі.
Напрыклад, у адной з размоваў Багуслаеў гутарыць з кіраўніком маскоўскага заводу Сітновым і прапаноўвае паставіць рухавікі для верталётаў абыходнымі схемамі — праз Харватыю, Чарнагорыю. Пастаўка матораў і рухавікоў мадэлі Д-136 — адна з пазіцый.
Згодна з подпісамі, тэлефонныя размовы Багуслаева з расейскімі кіраўнікамі заводаў і ягонымі падначаленымі адбываліся ў 2021 годзе і з сакавіка 2022 году, калі ўжо ішла вайна. У СБУ кажуць, што ўладальніка «Мотор Січ» ніяк не спыняў факт вайны, а ў адной з размоваў Вячаслаў Багуслаеў адкрыта прызнаўся, што абстрэл расейскімі войскамі ягонага ж заводу — не бяда, яны «гэта разумеюць».
Тым часам польская аўтарытэтная Gazeta Wyborcza ў сваім матэрыяле пра арышт Вячаслава Багуслаева прыпомніла, што не так даўно экс-міністар абароны Польшчы Антоні Мацярэвіч планаваў супрацу з Мотор Січ.
Тады ўсур'ёз абмяркоўваліся пастаўкі матораў з Запарожжа для польскага войска. Вядома, што ўкраінскі завод удзельнічаў у тэндэры, абвешчаным Міністэрствам абароны Польшчы. Сёння Польшча адна з краін, якая настойвае на найбольш жорсткай пазіцыі ў дачыненні Расеі за яе вайну супраць Украіны, а Багуслаеў пад следствам.
«Мотор Січ» — вытворца рухавікоў для авіятэхнікі і прамысловых газатурбінных установак. Кампанія мела бізнэс у Балбасаве, дзе прапаноўвалася рамантаваць верталёты. Аднак затым ва ўладаў Беларусі і Багуслаева здарыўся канфлікт, у Балбасава прыехаў Лукашэнка і ў 2018 годзе загадаў нацыяналізаваць прадыпрыемства. Гісторыя «Мотор Січ» з бізнэсам у Беларусі са скандалам скончылася.
