Садружнасць незалежных дзяржаў, утвораная на пачатку 90-х на месцы спачылага СССР, паводле шэрагу экспертаў, імкліва развальваецца. Самымі актыўнымі ў гэтым кірунку застаецца Расеі і лукашэнкаўскі рэжым у Беларусі. Паколькі спартоўцы Расеі і Беларусі апынуліся пад магутнымі міжнароднымі санкцыямі пасля нападу іх урадаў на Украіну, выхаду на важныя спаборніцтвы цяпер няма.
І хоць беларускія чыноўнікі адзначаюцца ў прэсе бравадай, маўляў, «міжнародныя турніры без беларусаў і расейцаў сталі слабымі», «яны нас проста баяцца» і так далей, для ўсіх відавочна, што беларускі і расейскі спорт упалі на шлях дэградацыі, «варэння ў сваім саку», што не прыводзіць да добрых наступстваў.
Сёлета Беларусь прыме II Гульні краін СНД. Спаборніцтвы прымуць 11 беларускіх гарадоў, у тым ліку Ворша. Пра гэта паведаміў начальнік упраўлення нацыянальных каманд Міністэрства спорту і турызму Міхаіл Пракапенка на пасяджэнні рабочай групы па падрыхтоўцы і правядзенні спаборніцтваў.
Ён зазначыў, што Гульні пройдуць ва ўсіх рэгіёнах краіны. Спаборніцтвы прымуць Менск, Барысаў, Берасце, Віцебск, Гомель, Гародня, Жлобін, Магілёў, Маладзечна, Ворша і Салігорск.
Раней намеснік прэм’ер-міністра Беларусі Ігар Петрышэнка паведамляў аб дзевяці гарадах, якія будуць прымаць ІІ Гульні краін СНД. Па словах начальніка ўпраўлення нацыянальных каманд, урачыстую цырымонію адкрыцця хочуць правесці 5 жніўня, закрыцця — 13 жніўня.
«Вызначаны спартыўныя аб’екты для правядзення спаборніцтваў па відах спорту, месца пражывання і харчавання ўдзельнікаў і гасцей, зацверджана праграма правядзення спаборніцтваў па відах спорту. Распрацавана сістэма кіравання гульнямі, якая складаецца з трох узроўняў, — рэспубліканскага, абласнога і рэгіянальнага», — цытуе БелТА Пракапенку.
Ён удакладніў, што гарадах, якія прымуць маштабны форум, збіраюцца арганізаваць аглядныя экскурсіі. Акрамя таго, у завяршальнай фазе падрыхтоўкі знаходзіцца план мерапрыемстваў культурнай і турыстычнай праграмы для ўдзельнікаў і заўзятараў. Таксама стала вядома аб тым, што прапрацоўваецца пытанне па ўдзеле ў асобных відах спорту дэлегацый з Манголіі, Кітая, Кубы, Ірана, Амана і Саудаўскай Аравіі. У праграме спаборніцтваў — баскетбол, гандбол, пляжны валейбол, пляжны футбол, міні-футбол, хакей на траве.
У аўторак удакладнілі, што відаў спорту ў праграме будзе 20, а не 21, як паведамлялася раней. Упершыню маштабны форум прыняла Казань (Рэспубліка Татарстан, Расея) у верасні 2021 года. Тады беларуская каманда стала пятай у медальным заліку і прывезла 69 узнагарод (9, 31, 29). Расея стала першай, заваяваўшы 212 медалёў (11, 42, 59).
