На базе роты в/ч 5524 у Воршы адбыліся «паказальныя выступленні», на якіх школьнікам паказалі тактыку разгону масавых пратэстаў. Прычым сілавікі былі са зброяй, у поўнай амуніцыі і нават з сабакамі.
Фотаздымкі рэжымнай прэсы хутка разляцеліся па сацыяльных сетках і выклікалі немалое абурэнне. У Воршы шмат людзей прайшлі праз затрыманні, арышты, катаванні і пагрозы. Натуральна, што карціна сілавога разгону пратэстаў у беларусаў часта выклікае стрэс, і гэта ніяк не спрыяе добраму стаўленню да сілавікоў, якія ў 2020 сталі на бок Лукашэнкі, а не народу.
Цяпер сілавыя структуры па ўсёй краіне праводзяць «патрыятычныя мерапрыемствы», расказваючы аб неабходнасці пераследаваць апазіцыянераў і далучацца да розных службаў, паступаючы ў вайсковыя і міліцэйскія навучальныя ўстановы.
Карыстальнікі інтэрнэту іранізуюць над некаторымі захадамі ўладаў, адзначаючы, што аўтарытэту сілавікам гэта не дадасць, а таксама саркастычна пытаюцца, ці будуць вышкалы па даванні хлуслівых паказанняў у судах, што неаднаразова робяць сілавікі ў Беларусі, каб пасадзіць пратэстоўца за краты.
