Пуцін абвясціў аб размяшчэньні тактычнай ядзернай зброі на тэрыторыі Беларусі. Па ягоных словах, да першага ліпеня ў Беларусі маюць дабудаваць сховішча для тактычнай ядзернай зброі. Дзе будзе тое сховішча, невядома. Прамоўлена гэта было 25 сакавіка, а ў Расеі рэдка калі выпадкова выбіраюць дату. Напэўна, гэта наўмысна было сказана ў Дзень Волі, свяце ўсіх нацыянальна сведамых беларусаў.

Пуцін паведаміў, што ў Беларусі, каб несці такую зброю, ёсць дзесяць самалётаў і ракетныя комплексы «Іскандэр». Журналісты Радыё Свабода паглядзелі, дзе можа размясціцца сховішча для тактычнай ядзернай зброі, калі яго сапраўды пабудуюць.

Адным з месцаў, дзе расейцы могуць паставіць сваю тактычную ядзерную зброю, можа стаць пасёлак Балбасава. Гэта дзейны вайсковы аэрадром, ён у Аршанскім раёне Віцебскай вобласці. Верагоднасць таго, што менавіта ў Балбасава расейскі дыктатар з маўклівай згоды свайго беларускага саўдзельніка перакіне тактычную «ядзерку», не самая вялікая, паколькі гэта самы блізкі да самой тэрыторыі Расеі аэрадром. А вайсковыя эксперты ацэньваюць сітуацыю так, што расейцы паспрабуюць падсунуць яе пад самыя межы Еўразвязу і Украіны.

І тым не менш, нічога нельга выключаць. Наша рэдакцыя сочыць за развіццём падзей.

Існуе тактычная і стратэгічная ядзерная зброя. Стратэгічная накіравана на знішчэнне гарадоў суперніка і на паражэнне вялікіх тэрыторый. Тактычная ж ядзерная зброя мусіць прымяняцца на «полі бою». Магутнасць такой зброі, як правіла, не перавышае некалькіх кілатонаў у трацілавым эквіваленце, а часцей менш за 1 кілатону. Аднак нейкай агульнай класіфікацыі і правілаў, якая магутнасць мусіць быць у тактычнай атамнай зброі, не існуе.

Ёсць азначэнне, што тактычная ядзерная зброя — гэта зброя паніжанай магутнасці, якую прымяняюць для перамогі ў ваеннай аперацыі, а не для канчатковага спынення вайны. Іншымі словамі, знішчэння ўсяго жывога навокал пасля ўдару такой зброяй ня будзе, але людзі і прырода зазнаюць вялікай шкоды.