Адміністрацыя чыгуначнага вакзала Воршы вырашыла вярнуцца да старой практыкі, якой карысталіся на нашым вакзале ў канцы ХІХ - пачатку ХХ стст. Тады на перон да цягнікоў пускалі па асобных квітках, якія купляліся перад вакзалам за сімвалічную плату.

Цяпер кіраўніцтва Менскага аддзялення Беларускай чыгункі прыняло пастанову аб зменах у парадку допуску пасажыраў да некаторых аб'ектаў чыгуначнай інфраструктуры. У акрэслены спіс уваходзіць і чыгуначны вакзал станцыі Ворша-Цэнтральная. Гэта робіцца праз імкненне зменшыць запаўняльнасць перонаў людзьмі, якія не маюць дзейных праязных білетаў на маршруты Беларускай чыгункі.

Імаверна, адной з прычын з'яўляецца і боязь кіраўніцтва БЧ перад новымі магчымымі дыверсіямі на чыгуначных каляінах. Аднак афіцыйна ў дакументах гэта, вядома ж, не прапісваецца.

Такім чынам, паўночны і паўднёвы ўваходы чыгуначнага вакзалу абсталююць турнікетамі, каб прайсці якія, трэба будзе купіць перонны талон у адмысловай касе за гатоўку ці электронным чынам. Першыя каляіны паўночнага і паўднёвага бакоў адасобяць ад уваходаў у вакзал агароджай з брамкамі для ўваходу на перон.

Што тычыцца сумы талону, то ягоны кошт будзе раўняцца 2 беларускім рублям. Заплаціўшы гэтую суму, асобы, якія праводзяць сваіх блізкіх, змогуць прайсці непасрэдна да вагонаў, паднесці рэчы і развітацца ці сустрэць блізкіх. Самі пасажыры ад платы за ўваход на перон вызваляюцца.

Канструяванне агароджаў пачнецца 15 красавіка, увядзенне талонаў для ўваходу на перон адбудзецца ў траўні-чэрвені.