За апошнія некалькі дзён у Воршы адбылося некалькі выпадкаў махлярства, паведаміла абласная міліцыя. Памер «улову» злачынцаў перавысіў 250 базавых велічынь.
Часта ахвяры падману пры апытанні расказваюць, што з імі ў мэсэнджэры звязваліся нібыта супрацоўнікі банка і паведамлялі, што на іх імёны аформлены крэдыты, а для пагашэння крэдытаў неабходна аформіць новы на максімальную суму і перавесці грошы на ўказаны аферыстамі рахунак.
Таксама ў Воршы пачасціліся махлярствы, звязаныя з пакупкамі ў інтэрнэце, у прыватнасці ў Instagram. Толькі за адзін дзень на мінулым тыдні ў Аршанскае РУУС звярнуліся двое аршанцаў, з якімі перастаў выходзіць на сувязь прадавец пасля таго, як яны расплаціліся з ім за пакупкі.
Па ўсіх дадзеных фактах махлярства следчыя пачалі крымінальныя справы.
Раней мы паведамлялі пра махлярствы з дзіцячымі вазкамі. Маладыя бацькі пераводзілі грошы за вазок для дзіцяці, але тавар ім ніхто не прысылаў.
