Абаронца аршанскага «Лакаматыву» Дзмітрый Іванчыкаў закінуў смешную шайбу... ва ўласную браму. Гэта адбылося ў матчы «чыгуначнікаў» са жлобінскім «Металургам». Але «Лакаматыў» усё адно перамог 4:2.
Адметна, што да гэтага паядынку ў аршанцаў было 10 паразаў запар. Кур’ёзная прапушчаная шайба не перашкодзіла спыніць негатыўную серыю.
Паколькі ў хакеі існуе кансерватыўнае правіла, якое, у адрозненне ад футболу, не ўлічвае панятку «аўтагол», шайбу залічылі на рахунак хакеіста «Металургу», які апошнім крануўся шайбы. Але Захар Палішчук дакладна павінен перадаць усе лаўры за паляпшэнне ўласнай статыстыкі Іванчыкаву.
«Лакаматыў» ідзе на 7-м месцы ў рэгулярным чэмпіянаце. Яго адставанне ад тройкі лідэраў складае 13 пунктаў. Агулам у беларускай Экстралізе выступаюць 12 каманд.
