На ўчастку Ворша — Менск 18 лістапада 2023 года адбылася яшчэ адна працяглая затрымка пасажырскага цягніка, якая выклікала яго спазненне па прыбыцці на канцавую станцыю маршруту больш чым на паўтары гадзіны.
І ўжо традыцыйна БЧ не раскрывае прычын чарговага «бязладдзя», піша «Супольнасць чыгуначнікаў Беларусі».
Цягнік рэгіянальных ліній бізнес-класу нумар 863 Ворша-Цэнтральная — Менск-Пасажырскі (у адпаведнасці з графікам адпраўленне — 15:05, прыбыццё 17:20) у названую дату рухаўся саставам электрацягніка ЭПР-002 прыпіскі маторвагоннага дэпо Мінск (ТЧ-9, Мінскае аддзяленне БЧ).
Па прычыне няспраўнасці электрычнай схемы электрацягніка машыніст не змог своечасова адправіцца з пачатковай станцыі — Ворша-Цэнтральная. Для забеспячэння руху цягніка нумар 863 быў задзейнічаны дапаможны (грузавы) лакаматыў БКГ2-010 прыпіскі лакаматыўнага дэпо Баранавічы.
Затрымка пасажырскага цягніка № 863 на ўсім працягу ўчастку Ворша — Менск ажыццяўлялася з грузавым лакаматывам на чале. У выніку спазненне цягніка № 863 пасля прыбыцця на канцавую станцыю Менск-Пасажырскі склала 01:40.
З-за гэтага спазнення быў затрыманы па адпраўленні і цягнік рэгіянальных ліній эканом-класа нумар 6021 Ворша-Цэнтральная — Менск-Пасажырскі (у адпаведнасці з графікам адпраўленне — 15:20, прыбыццё — 19:28, агульны час руху 04:08) на 40 хвілін. І то дзякуючы намаганням машыніста, спазненне на канцавую станцыю ў выніку склала тольк 7 хвілін.
На трэція суткі пасля выхаду з дэпо па рамонце электрацягнік «злавіў» сур’ёзную няспраўнасць, піша «Супольнасць».
Як адзначае рэсурс, «дзякуючы прадугледжаным шчылінам у нарматыўных дакументах фактычна „паўнавартасная“ падзея, звязаная з парушэннем правілаў бяспекі руху і эксплуатацыі чыгуначнага транспарту і па факце з’яўляецца сур’ёзнай адмовай тэхнічнага сродку і правалам якасці паслуг, пераводзіцца ў разрад нічым не прыкметнага выпадку».
Беларуская чыгунка выбачылася за «часовыя нязручнасці», аднак ні слова не напісала пра гатоўнасць выплаціць кампенсацыі пасажырам.
