База "Миротворець”, якую вядуць спецслужбы Украіны, апублікавала спіс беларусаў, якія належалі да прыватнай вайсковай кампаніі Вагнера, якая кіруецца Дзмітрыем Уткіным, набліжаным да Крамля чалавекам. Мае дачыненне да арганізацыі і давераная асоба Пуціна Яўгеній Прыгожын. У гэтым падраздзяленні ваяваў і аршанец Аляксандр Ступніцкі, дата нараджэння 27 верасня 1989 года. Пра беларусаў, якія ваявалі ў гэтым фармаванні ўслед за іх з“яўленнем ва ўкраінскай базе распавёў беларускі незалежны тэлеканал «Белсат».
Аляксандр Ступніцкі на Данбасе быў выведнікам-сувязістам.
Па дадзеных інтэрнэт-газеты «Фонтанка» увесну 2014 ПВК нелегальна дзейнічала ў інтарэсах Расеі на тэрыторыі Украіны ў Крыме. Служба бяспекі Украіны 7 кастрычніка 2017 паведаміла вынікі свайго расследавання, згодна з якім першая інфармацыя аб баевіках Вагнера з'явілася 29 мая 2014. Яны ўдзельнічалі ў баях за Луганскі аэрапорт (72 найміты, 15 загінулых) і ў бітве за Дэбальцава (205 наймітаў, 21 загінулы). СБУ падазрае двух наймітаў у збіванні Іл-76 пад Луганскам 14 чэрвеня 2014. Акрамя таго, баевікі Вагнера ўдзельнічалі ў дыверсіях і правакацыях супраць сіл АТА на лініі размежавання. Кіраўнік СБУ заяўляе, што ўстаноўлены дадзеныя 277 чалавек, якія ваявалі на Данбасе пры гэтым агульная колькасць баевікоў ПВК, па ацэнцы СБУ, складае каля 5 тысяч чалавек.
