Візіт Аляксандра Лукашэнкі ў Аршанскі раён праходзіць пры вялікай колькасці скандалаў. Ужо знятыя са сваіх пасадаў міністры прамысловасці і архітэктуры і будаўніцтва, пазбавіўся свайго партфелю кіраўнік Аршанскага райвыканкама Аляксандр Пазняк, строгая вымова аб`яўлена кіраўніку Віцебскай вобласці Мікалаю Шарснёву, наперадзе, верагодна, яшчэ шэраг кадравых перастановак, а, магчыма, нават крымінальных спраў супраць кіраўнікоў гаспадарак і заводаў раёна.

Пасля рэзананснага прыезду на Інструментальны завод, дзе кіраўніцтва так баялася Лукашэнкі, што, па словах кіраўніка дзяржавы, загадала перад яго прыездам класці асфальт на траву, гнеў прэзідэнта абрынуўся на кіраўнікоў «Тэхнікі сувязі» ў Барані і высокіх чыноўнікаў, якія быццам не ўсачылі за выкананнем ягоных загадаў. Увесну 2017 года Лукашэнка на шыкоўным аўтамабілі прыязджаў у Барань і паабяцаў жыхарам вырашыць усе праблемы горада. Аднак цяпер, калі больш чым за год стала ясна, што эканамічнае становішча Барані стала яшчэ горшым, чым тады, Лукашэнка знайшоў вінаватых у асяродку чыноўнікаў. У прыватнасці, сярод кіраўніцтва «Тэхнікі сувязі», якое замест мадэрнізацыі прадпрыемства і асобных будынкаў, па яго словах, захацела адправіць будынак «пад бульдозер». Да чыноўнікаў Лукашэнка звярнуўся з крыкам, што паказалі і дзяржаўныя тэлеканалы:

Я вас папярэджваў: працаваць там трэба, як у ваенны час. І Шэймана туды паслаў, які нічога не зрабіў у плане кантролю. Нічога! Генерал!

Прааналізуем публічна, што там зроблена? Грошы далі, ільготы далі, адтэрміноўку, растэрміноўку. Тыдзень працы! І калі гэта зроблена, пытанне, калі я ў красавіку 2017 года паставіў задачу. Сфармаваныя пералікі неэфектыўнага выкарыстання маёмасці! Гэта значыць на ліст напісалі, што пад бульдозер, што прададзім.