Улады яшчэ нядаўна абяцалі, што Балбасава ператворыцца на месца, у якім захочацца жыць людзям. Яны пачалі шырокамаштабны рамонт. Кіраўнік Беларусі Аляксандр Лукашэнка загадаў падначаленым, каб шэраг аб'ектаў у Аршанскім раёне быў гатовы да 7-га лістапада. На пачатку месяца павінен прыехаць у Балбасава і ён сам. На балбасаўскіх вуліцах сапраўды разгарнулі работы, але толькі з аднаго боку — з галоўнай вуліцы, па якой і павінен праязджаць прэзідэнт падчас свайго візіту. З яе боку ўсе дамы зацяплілі, прыгожа пафарбавалі і размясцілі на дамах плакаты ў гонар герояў Савецкага Саюза, імёнамі якіх названы шэраг вуліц на Аршаншчыне.
Аднак з іншага боку ад вуліцы не змянілася абсалютна нічога, там дамы выглядаюць так, як і выглядалі шмат гадоў таму. Атрымліваецца, усе работы ў дамах зробленыя толькі для вачэй кіраўніка дзяржавы, а як на свае дамы будуць глядзець жыхары Балбасава, якія ходзяць не толькі па галоўнай вуліцы, але і па двары, аўтараў "рэканструкцыі" не хвалюе.
