Інтэрнат на вуліцы Астроўскага, 2 у Барані знаходзіцца на балансе ЖЭУ № 8 – філіялу «Оршакамгас». Будынак паставілі амаль сорак гадоў таму, аднак капітальнага рамонту ў ім не рабілі ні разу. Orsha.eu ужо рабіў матэрыял пра жахлівыя і нечалавечыя ўмовы пражывання ў гэтым інтэрнаце. Некаторыя людзі параўналі такія ўмовы, у якіх жывуць звычайныя людзі, з умовамі ў турме, ды і тое, відаць, турма выйграе. Цяпер аршанскія чыноўнікі зразумелі — праблему не схаваць. А затым інфармацыя стала цікавіць і іншых журналістаў. Здымачная група праекту тэлеканала "Белсат" "Маю права" накіравалася ў Барань, каб на ўласныя вочы пабачыць, у якіх умовах даводзіцца жыць людзям.
Вядомы віцебскі праваабаронца Павел Левінаў заявіў, што людзям не варта аплочваць тыя паслугі ў жыроўках, якія фактычна ім не аказваюцца. А таксама параіў жыхарам звярнуцца ў суд, бо толькі так можна абараніць свае правы і атрымаць магчымасць у хуткім часе палепшыць свае жыллёвыя ўмовы. Бо ад чыноўнікаў, нягледзячы на іх бясконцыя абяцанні і гарантыі, ніякай дапамогі людзі так і не дачакаліся. Названы інтэрнат прасілі капітальна адрамантаваць яшчэ ў 2016 годзе. На дварэ праз месяць 2019-ты, аднак уладальнікі высокіх партфеляў і камунальныя службы дагэтуль не прынялі ніякіх мераў.
