Летась "Вітэн" стаў уладальнікам Кубка Беларусі ў трэці раз за гісторыю. Цяпер надарыўся шанц выйграць тытул у чацвёрты раз. Фінальная гульня праходзіла ў Магілёве, а ў суперніках быў традыцыйны нялёгкі "Лідсельмаш". Што і казаць, калі й сёлета лідзяне заслугоўваюць панятку "нязручны супернік" для аршанцаў. Менавіта "Лідсельмаш" адзіны клуб, які перамог "Вітэн" у чэмпіянаце. Фінальны матч Кубка адразу захапіў гледачоў.
Спартовы комплекс "Алімпіец" сабраў на трыбунах 1,5 тысячы гледачоў. Першымі адкрылі лік "чырвона-чорныя", ужо на старце 2-й хвіліны ён прабіў брамніка супернікаў Змыслю. Але каманда, якую ўзначальвае колішні трэнер "Вітэна" Віктар Тарчыла, натуральна, не збіралася здавацца. Зэдэлашвілі на 3-й хвіліне сквітаў гол, Белы на 5-й зноў вывеў аршанцаў наперад 2:1, яшчэ адзін гулец "Лідсельмаша" з грузінскімі каранямі Себіскверадзэ на 16-й зноў зраўняў. І ўсё ж на перапынак каманды пайшлі пры перавазе "Вітэна", за хвіліну да сірэны Зэдэлашвілі зрэзаў мяч у сетку ўласнай брамы.
У другім тайме не прайшло і трох хвілін, як вартавы брамы "Вітэна" Лысенка дастаў з сеткі два мячы ад усюдыіснага Жыгалкі. Упершыню за матч наперад выйшлі лідскія футбалісты. На 24-й хвіліне Белы аформіў хэт-трык, нічыя 3:3 у асноўны час. У серыі пасляматчавых пенальці мацней аказаўся міні-футбольны клуб "Лідсельмаш", ракавы промах дапусціў Козел, прычым на серыю пенальці лідская каманда выпусціла Андрэя Галаўнёва - яшчэ аднаго былога гульца "Вітэна". Перамога "Лідсельмаша" 4:3 па пенальці, і гэтая каманда ўпершыню заваёўвае Кубак Беларусі.
Таксама адзначым, што перад фінальнай гульнёй на Кубак таварыскі матч правялі ветэраны міні-футболу Магілёва і ветэраны зборнай Беларусі. Магілёўцы выйгралі ў зборнай краіны 6:3, у складзе ветэранскай зборнай Беларусі гулялі аршанцы Юрый Алейнікаў і Аляксандр Кальм.
Фота mini.football.by.
