Шапікі "Табакерка", якія належаць кампаніі «Энэргія-ОІЛ», якую кантралюе набліжаны да Лукашэнкі Аляксей Алексін, працягваюць імкліва запаўняць прастору ў Беларусі, у тым ліку на Аршаншчыне. Напярэдадні чарговы шапік прывезлі ў Барань. Пакуль ён яшчэ не працуе, унутры няма тавара, але спосаб усталявання гаворыць сам за сябе. Відаць, асфальту для шапіка не знайшлося, і яго паставілі побач з ходнікам ...проста на газон! Фота зрабіў блогер Малінаўскі.
Пад «Табакеркі» ўлады абавязаныя без аўкцыёну падаць у арэнду інвестару зямельныя ўчасткі для будаўніцтва і абслугоўвання гандлёвых аб'ектаў. Гэта шапікі, крамы, павільёны і неізаляваныя пункты, у якіх не менш за 80% тавару — тытунёвыя вырабы, якія ў звычайных крамах. дарэчы, знаходзяцца ў адмысловай шафцы і не дэманструюцца пакупнікам адкрыта ў адрозненні ад алкагольных вырабаў. Па краіне пад "Табакеркі" выдзелена 2500 участкаў. Завяршыць стварэнне недзяржаўнай сеткі па гандлі тытунёвымі вырабамі плануюць да канца 2020 года.
У Віцебску збіралі подпісы супраць усталявання гэтых шапікаў, каб не прапагандаваць лішні раз сярод моладзі звычку, што вядзе да страты здароўя і цэлага букету хваробаў. Але віцебскія чыноўнікі адмовіліся прыбіраць "Табакеркі" з аўтобусных прыпынкаў у горадзе. Асабліва нелагічна шапікі з тытунёвымі вырабамі выглядаюць на прыпынках грамадскага транспарту, на якіх, згодна з Адміністрацыйным кодэксам, курыць забаронена. Праўда, гэтая норма сістэматычна парушаецца ў Оршы, Барані і іншых гарадах.
Нагадаем, што нядаўна ў Оршы паставілі кур'ёзны аўтобусны прыпынак, які не вытрымлівае ніякай крытыкі і сабраў шмат заўваг, у тым ліку і ад чытачоў Orsha.eu.
