Агулам па двух аршанскіх выбарчых акругах кандыдатаў у дэпутаты набралося 9 чалавек, што не так ужо і мала. Тым больш, што кандыдаты яшчэ могуць вылучацца і партыямі, што адбудзецца крыху пазней.
Па Аршанскай гарадской акрузе свае ініцыятыўныя групы зарэгістравала 4 чалавекі. Найбольш актыўна ўжо пачаў збор подпісаў блогер Дзмітрый Казлоў вядомы ў ю-тубе як "Серый кот". Ён безпартыйны, сімпатызуе дэмакратам і таму пікеты робіць пад бел-чырвона-белым сцягам.
Зарэгістраваўся таксама Аляксандар Школьнікаў. Пакуль пра яго мала інфармацыі, вядома, што ён даўні актывіст і сёння вылучаецца пры падтрымцы аргкамітэта па стварэнні Беларускай сацыял-дэмакратычнай партыі "Народная грамада", які ўзначальвае Мікалай Статкевіч.
Відавочны кандыдат ад улады на гэтай акрузе Інна Крачэк. Яна кіруе аршанскім радзільным домам і як палітык ніколі пра сябе не заяўляла.
Адзіны кандыдат, які вылучаецца ад зарэгістраванай партыі - Сяргей Пракапчук, сябра Аб'яднанай грамадзянскай партыі. Пракапчук мае права на партыйнае вылучэнне, але, відавочна, вырашыў больш папрацаваць з выбаршчыкамі. Пакуль за яго збіраюць подпісы абыходам кватэраў, але, відавочна, будуць выстаўляцца і пікеты. Пракапчук - былы прадпрымальнік, але сёння працуе ў адміністрацыі прыватнай будаўнічай фірмы.
Па 26-ай Аршанскай-Дняпроўскай акрузе ў якой будуць галасаваць жыхары раёну ды прычыгуначнай частцы горада вылучаецца 5 кандыдатаў.
Першым зарэгістраваў сваю ініцыятыўную групу дзеючы дэпутат Віталь Чудовіч - відавочны праўладны кандыдат. Да свайго дэпутацтва ён працаваў на чыгунцы.
Яшчэ адзін кандыдат з чыгуначнікаў - Валерый Агеенка. Ён працуе машыністам і з'яўляецца незалежным кандыдатам, які вылучыўся без падтрымкі нейкіх палітычных структураў.
Вылучаюцца па гэтай акрузе адразу два фізкультурнікі. Гэта стварае хоць нейкі інтарэс да кандыдатаў, хаця б каб зразумець якая будзе іхняя роля ў выбарчай кампаніі. Цалкам верагодна, што фізрук Копысскай школы Васіль Дымкоў будзе спарынг-партнёрам Чудовіча. Дымкоў ужо балатаваўся на выбарах, прынамсі на мясцовых, дзе таксама быў спарынт-партнёрам выканкамаўскай кандыдатцы, якая і выйграла.
Другі фізкультурнік - Вадзім Чарняўскі інструктар ФСК "Орша", які працуе ў Барані. Чалавек ён даволі заўважны, але ніколі пра палітычныя амбіцыі таксама не заяўляў.
Адзіны партыйны кандыдат па гэтай акрузе Алена Кучынская. Яна сябра Аб'яднанай грамадзянскай партыі, хаця вылучаецца пры падтрымцы Руху "За свабоду". Яна вядомы грамадскі актывіст, і раней ужо вылучалася кандыдатам у дэпутаты мясцовага савета.
