У асенне-зімовы перыяд светлавы дзень кароткі. Для таго, каб конны транспарт быў добра заўважны ў цёмны час сутак, яго ўладальнікам неабходна пазначыць калёсы святлоадбівальнымі элементамі. Для праверкі таго, як выконваецца гэтае патрабаванне, Дзяржаўтаінспекцыя Віцебскай вобласці праводзіць комплекс прафілактычных мерапрыемстваў з уладальнікамі коннага транспарту. Напярэдадні яна прыехала з праверкай у Дубровенскі раён.
Дзяржаўтаінспекцыя нагадвае, што згодна з п. 200 Правілаў дарожнага руху транспартны сродак з коннай цягай павінен быць абсталяваны спераду святлоадбівальнікам белага колеру, ззаду — чырвонага, а таксама мець прадугледжаныя канструкцыяй спраўную стаяначную тармазную прыладу і супрацьадкатныя ўпоры. За парушэнне дадзенага пункта ПДР прадугледжана адміністрацыйная адказнасць па арт. 18.23 частка 1 КоАП Рэспублікі Беларусь у выглядзе штрафу да трох базавых велічынь.
