Ад пачатку лета людзі значна раслабіліся ў дачыненні да прафілактыкі Covid-19. Тым не меньш, вірус нікуды не знік і працягвае распаўсюджвацца. У сацыяльных сетках і мэсэнджэрах усё больш паведамленняў пра новую ўспышку захворванняў у раёне, дзесяткі памерлых за суткі і, нават, пра тое, што горад могуць закрыць для ўезда і выезда. Канешне, большасць гэтых паведамленняў - чуткі, але ва ўмовах калі афіцыйныя асобы маўчаць і зноў не даюць статыстыку па захворваннях, такія чуткі распаўсюджваюцца ўсё больш актыўна і абрастаюць новымі неверагоднымі падрабязнасцямі.

Па ўскосных сведчаннях, мы сапраўды можам гаварыць пра новую ўспышку захворванняў. Па інфармацыі атрыманай ад медработнікаў у сувязі з новай успышкай у Оршу на днях прыязжаў міністар аховы здароўя, але - ізноў жа - гэтую інфармацыю ніхто публічна не апублікаваў і не падцвердзіў.

Таксама па нашай інфармацыі, людзі з падазрэннем на вірус выяўлены амаль на ўсіх прамысловых прапрыемствах горада. У сувязі з гэтым, напрыклад, завод Лягмаш на сваёй тэрыторыі ўвёў свой масачны рэжым для работнікаў. Фотаздымак адпаведнага загаду у нашую рэдакцыю даслалі работнікі прадпрыемства. Прычым у загадзе ёсць спасылка на ліст цэнтра эпідэміялогіі без нумара, датаванага 18 чэрвеня. Відавочна, што такі ж ліст разасланы і ў іншыя арганізацыі раёна, адпаведна і ў іх будзе ўведзенае абавязковае нашэнне масак.