22 лютага 2020 году пад Стахоўкай на трасе М8 Менск-Віцебск здарылася жудасная аварыя. Два чалавекі загінулі і два атрымалі раненні.

Аршанцу, які стаў вінаватым у смяротным ДТЗ, вынеслі прысуд. Суд пакараў яго 4,5 гадамі пазбаўлення волі ў калоніі-пасяленні.

У той дзень аўтамабіль 20-гадовага аршанца сутыкнуўся з сустрэчным аўтамабілем, бо кіроўца паехаў па сустрэчнай паласе руху. У выніку на месцы загінула маладая жанчына, якая сядзела ў другой машыне на пасажырскім сядзенні побач з кіроўцам. Кіроўца другога аўтамабіля і яго жонка атрымалі менш цяжкія і цяжкія пашкоджанні. На судзе пацярпелыя настойвалі на вынясенні максімальнага прысуду для вінаватага.

Другой загінулай стала спадарожніца вінаватага ў ДТЗ. Яна атрымала цяжкія траўмы і памерла ў бальніцы праз тыдзень.

Асуджаны сваёй віны не прызнаў і не выказаў раскаяння за зробленае. Ён сцвярджаў, што не мог выехаць на сустрэчную паласу, бо добра ведаў дарогу і не перавышаў хуткасць. Па паказу сведкі, які ехаў у той дзень на сваім аўто наперадзе, вінаватым у ДТЗ стаў менавіта малады чалавек.

Суд Аршанскага раёну і гораду Оршы з улікам вынікаў аўтатэхнічнай экспертызы і паказанняў сведак прызнаў мужчыну вінаватым. Пад увагу прынялі ненаўмыснасць дзеянняў абвінавачанага. Акрамя тэрміну ў турме, аршанцу вынеслі забарону на кіраванне на працягу 5 гадоў.