Памятаеце 18-гадовага хлопца, які на мосце паміж Мікрараёнам і Ільнокамбінатам страляў у пасажырскі аўтобус? Прайшло крыху больш за месяц і на пацана заводзяць новую крыміналку праз якую ён ужо дакладна атрымае тэрмін, у лепшым выпадку ўмоўны.

Другі інцыдэнт у маладога злачынцы адбыўся на Міра 71. Гэта дом-маласямейка побач з Інжынерным завулкам і закінутай крамай. Зручнае месца для таго, каб бухнуць (калі не ўлічваць, што камеры відэа-назірання цяпер ёсць і тут), для чаго і пайшлі сюды два прыяцелі з двума двушкамі піва. Адзін з іх — той самы 18-гадовы, які ўжо тады лічыўся падазраваным за стральбу па аўтоубсе і мусіў бы падумаць пра тое, каб нікуды не ўляпацца дадаткова. У нейкі момант міма праходзіў 15-гадовы падлетак. І выпіўшы будучы зэк вырашыў завесці эстэтычныя дэбаты. Справа ў тым, што ў падлетка была модная сучасная прычоска. А ў 18-гадовага традыцыйныя гопніцкія кароткастрыжаныя валасы. Ну, а што... Калі чалавек у 18 гадоў мэтанакіравана імкнецца ў вязніцу, то і прычоска і субкультура павінны быць адпаведныя. Пасля кароткай спрэчкі будучы зэк пачаў збіваць падлетка. Нават калі той упаў, то збіваў нагамі.

Меньш за суткі (як і ў выпадку з аўтобусам) спатрэбілася каб знайсці злачынцу. І калі ў выпадку з аўтобусам справу можна было б звесці да хуліганкі без рэальнага тэрміну з кампенсацыяй выдаткаў аўтапарка, то пасля збіцця непаўнагадовага ад пакарання гопнік ужо не адкруціцца. Пытанне толькі ў жорсткасці пакарання.