Спіс гэты апублікаваны літаральна на днях і не мае прозвішчаў рэальных экстрэмістаў - большасць людзей асуджаныя за абразу Лукашэнкі, або нейкіх чыноўнікаў. Сёння ў спісе 270 чалавек, сярод іх даволі шмат аршанцаў. Так, у ліку апошніх дабаўленых у гэты спіс пад нумарам 268 стаіць Уладзімір Шынкевіч, а насупраць яго пазнака "Адбывае пакаранне". Праўда, Шынкевіч раней асуджаны за абразу Лукашэнкі ўжо адбыў пакаранне і сёння знаходзіцца на свабодзе. Пад нумарам 267 знаходзіцца Максім Шаўлінскі, які выйшаў яшчэ ў верасні мінулага года па пробнай амністыі. У спісе ён таксама "Адбывае пакаранне". Ёсць у спісе і Сяргей Парфененка, якому таксама прыпісана "Адбывае пакаранне". Насамрэч Парфяненка не сядзеў па прысудзе аніводнага дня - ён з'ехаў з краіны і зараз знаходзіцца ў вышуку. То бок, адна частка міліцыі яго шукае, а другая лічыць, што ён сядзіць на хіміі.
Гэта толькі некалькі чалавек памылкі па якіх мы вызначылі адразу. Калі ж спіс прагледзець уважлівей, відавочна, у ім будзе значна больш памылак.
