Пазітыўная навіна прыйшла са сферы медыцыны: 18 жніўня ў Оршу перададзена 8 аўтамабіляў хуткай дапамогі. Не сакрэт, што ў раёне не хапае спецыялізаваных аўтамабіляў, бывае, што хворых возяць нават на легкавушках. А 8 машынаў маглі б прынцыпова памяняць сітуацыю. Ва ўрачыстай атмасферы чыноўнікі перадалі і атрымалі машыны, але нюанс заключаецца ў тым, што машыны перададзеныя не Аршанскаму раёну, а створанаму ў гэтым годзе Аршанскаму міжраённаму цэнтру хуткай дапамогі. У аб'яднаны цэнтар уваходзіць акрамя Аршанскага Талачынскі, Дубровенскі і Чашніцкі раёны.
Адразу пасля ўрачыстай перадачы аўтамабіляў у Оршу, тры з іх з'ехалі з горада ў Талачын. Калі дапусціць, што Чашнікам і Дуброўна таксама аддадуць хаця б па адным аўтамабіле, то тыя аўтамабілі якія застануцца ў нашым раёне не мяняюць сітуацыю ў медыцыне прынцыпова. Лепш чым нічога, але радасць нашая была не доўгай.
