Нагадаем, што не так даўно скончылася грамадскае абмеркаванне па даволі балючым для Оршы пытанні - пытанні чыгуначнага маста, які злучае (ці дакладней падзяляе) раёны Усходняя і Чаромушкі. Ідэя чыноўнікаў у тым, каб прыбраць з пад маста пешаходныя дарожкі і за кошт гэтага пашырыць праезную частку. Пры гэтым для пешаходаў зрабіць падземны пераход з боку Інструментальнага заводу, дзе зараз пад чыгуначным палатном ідзе стокавая труба.

Ідэя спрэчная і выклікала рэзананс, таму на грамадскае абмеркаванне прыйшла некаторая колькасць прапановаў. Першая прапанова: адну пешаходную дарожку пад мастом усё ж паставіць, што лагічна. Уявіце, што вам хочацца бяспечна перайсці дарогу з боку крамы Еўраопт на Пагранічнай да Чаромушак на той жа бок. Вам давядзецца двойчы пераходзіць вуліцу Міра, адзін раз вуліцу Пагранічную ды яшчэ і спусціцца ў падземны пераход. Спусціцца, бо чакаецца, што ён будзе крыху заглыбленым.

Другая прапанова дастаткова катэгарычная: адмовіцца ад гэтага варыянту і перарабіць праэкт, каб па іншаму арганізаваць пешаходны рух. Прапанова таксама ластаткова лагічная. Па сёняшніх урбаністычных тэндэнцыях, больш камфортна павінна быць пешаходам, а не транспарту.

Трэцяя прапанова: прадугледзіць дадатковыя магчымасці для маламабільных грамадзянаў.

Усе заўвагі будуць перададзеныя ў адмысовую камісію, але пакуль, бачна, выканкам не адмовіцца ад гэтага праэкту.