Пра тое, што дзесці каля Лядовага палацу жыве дзікі заяц нам ужо распавядалі мясцовыя жыхары. Але як і іншыя лясныя звяры заяц вельмі асцярожна паводзіў сябе ў горадзе, выходзіў пасвіцца толькі па начах і ўвогуле імкнуўся лішні раз не бачыцца з людзьмі. Для зайца пераезд з лесу ў райцэнтар стаў зручным метадам выжывання - драпежнікаў мала, а тыя што ёсць ходзяць на павадку, канкурэнтаў па ежы таксама амаль няма. У выніку, як можна пабачыць па фотаздымках, заяц не проста не кепска жыў у Оршы за лядовым палацам, а разажраўся і стаў вялікім і дастаткова тоўстым.
Ды нешта адбылося ў ноч з нядзелі на панядзелак. Заяц выйшаў са сваёй схованкі на начную прагулянку і нечага спужаўся. Людзі яго пабачылі калі звер бег па тратуары. Калі побач праязжала машына таксі, заяц рэзка звырнуў на дарогу - відавочна жывёла была спужаная нечым - у проста ўрэзаўся ў рухаўшыся аўтамабіль. Ад удару жывёла на кароткі час страціла прытомнасць і перастала рухацца. Людзей такое здарэнне здзівіла. Яны паднялі зайца і перанеслі з дарогі на траву, але заяц з-за шоку некаторы час яшчэ не мог сыйсці назад у сваю норку, хаця чыста знешне аніякіх пашкоджанняў у жывёлы не назіралася.
