На гэты раз тэлефонныя махляры дазванілі да 53-гадовай жанчыны. Правільней, дарэчы іх назваць не тэлефоннымі, а вайбернымі. Колькі б не тлумачыла міліцэйская прафілактыка, што ні банкаўскія работнікі, ні міліцыянты праз вайбер па працы не званяць, але людзі вераць махлярам. Жанчыне распавялі, што яна можа дапамагчы злавіць злачынцаў ,якія нешта там мухлююць з банкаўскімі карткамі. Жанчына не адразу паверыла, але калі ёй пачалі пагражаць, што адмова ад дапамогі міліцыі таксама можа быць пакараная, яна не проста пагадзілася, а патраціла на гэта некалькі дзён.
Некалькі дзён жанчына бегала па розных банках і брала крэдыты, якія і перасылала махлярам. Агулам жанчына перавяла свайму вайбернаму суразмоўцу 16 з паловай тысяч рублёў. Спынілася яна толькі тады, калі сітуацыю распавяла кіраўніку на сваёй працы. Ён яе і спыніў ды параіў звярнуцца ў міліцыю. Крымінальная справа заведзена, але пакуль такіх махляроў яшчэ ні разу не лавілі.
