Аб'ектыўна, мы яшчэ не адышлі ад залевы 27 ліпеня. А сіноптыкі амаль на кожны дзень прагназуюць аранжавы ўзровень небяспекі з-за навальніцаў і моцных вятроў. Праўда, здаецца, канкрэтна Оршу і вятры і навальніцы павінны абыйсці, але... Сіноптыкі - навукоўцы, якія рэгулярна дапускаюць памылкі і недакладнасці і лічаць гэта нормай сваёй прафесіі.
Больш дакладны прагноз на бліжэйшыя шэсць дзён менавіта на Аршанскі раён не прагназуе навальніцаў, але кожны дзень абяццае дажджы, пераважна кароткачасовыя. За выключэннем серады - у гэты дзень дождж можа ісці цэлы дзень. Таму лепш далёка парасоны не хаваць.
Затое пры магчымых дажджах павінна быць дастаткова цёпла. Нават у сераду павінна быць каля 25 градусаў. А на выходныя тэмпература паветра і ўвогуле стане добрай - да 28 градусаў, можна ехаць на возера, але - зноў жа - лепш з парасонам.
