У ноч з 1 на 2 лістапада 2010 года паўнавартасна запрацаваў тады яшчэ адзіны цалкам навіновы сайт прысвечаны Аршаншчыне - orsha.eu. Ад самага пачатку мы арыентаваліся перш за ўсё на падачу і абмеркаванне навінаў нашага рэгіёну. І, здаецца, нам гэта ўдалося. Кожны год мы імкнемся рабіць нешта новае. Не выключэнне і гэты год. У 2014 мы эксперsментавалі асабліва шмат. Сайт стаў у разы больш працаваць з відэа і фота, дэманстраваць відэа са спартовых спаборніцтваў, весці онлайн трансляцыі з месцаў падзяў, рэпартажы з футбольных матчаў з іншых гарадоў краіны, дзе ўдзельнічаюць нашыя спартсмэны. Нарэшце, паўнавартасна запрацавалі тыя ідэі якія мы доўга рыхтывалі - блогі і фотагалерэі. А ёсць тое што засталося нязменным - аператыўнасць і аб'ектыўнасць падачы інфармацыі.

Тое што мы рухаемся ў правільным кірунку і нашыя эксперыменты ўдалыя сведчыць самы аб'ектыўны паказчык якасці любога сродка масавай інфармацыі - рэйтынг. Кастрычнік гэтага году стаў ці не самым рэйтынгавым месяцам за ўвесь час работы сайту і рэйтынг працягвае расці. У кастрычніку-2014 за месяц сайт наведала 12.536 унікальных наведвальнікаў. Для параўнання ў лістападзе 2013 унікальных наведвальнікаў за месяц было 5.678. У сярэднім за суткі ў кастрычніку 2012 года на сайт выходзіла 230 карыстальнікаў за суткі, у кастрычніку 2013 250 карыстальнікаў/суткі, у кастрычніку 2014 за суткі ў сярэднім выходзіла 744 карыстальнікі інтэрнэту.

Дзякуем усім нашым аўтарам, людзям якія пастаўляюць інфармацыю, дапамагаюць яе збіраць і правяраць. Дзякуем усім, хто чытае наш сайт і каментуе яго. Мы пастараемся і ў пятым годзе нашай работы не змяншаць тэмпы і асвятляць жыццё нашага гораду з розных бакоў і неперадузята.

Калектыў orsha.eu